ਇਕ ਭੈਣ ਦੇ ਦੇ ਰੱਬਾ ਵੇ ਪਿਆਰਿਆ!
ਇਕ ਭੈਣ ਦੇ ਦੇ ਰੱਬਾ ਵੇ ਪਿਆਰਿਆ!
ਜੀ ਮੈਂ ਜੱਗ ਵਿੱਚ ਫਿਰਦਾ ਹਾਂ ਹਾਰਿਆ!
ਸਾਰੇ ਚਾਂਈਂ ਚਾਂਈਂ ਰੱਖੜੀ ਬੰਨ੍ਹਾਉਂਦੇ ਨੇ
ਫਿਰ ਆ ਕੇ ਇਕ ਦੂਜੇ ਨੂੰ ਦਿਖਾਉਂਦੇ ਨੇ
ਸੀਨਾ ਜਾਂਦੈ ਛੁਰਿਆਂ ਦੇ ਨਾਲ ਪਾੜਿਆ
ਇਕ ਭੈਣ ਦੇ ਦੇ ਰੱਬਾ ਵੇ ਪਿਆਰਿਆ!
ਭੈਣਾਂ ਵਰਗਾ ਨਾ ਦੁਨੀਆਂ 'ਤੇ ਸਾਕ ਵੇ
ਜਦੋਂ ਵੀਰਾ ਕਹਿ ਕੇ ਮਾਰਦੀ ਐ ਹਾਕ ਵੇ
ਬੰਦਾ ਜਾਂਦੈ ਅਸਮਾਨ ਉੱਤੇ ਚਾੜ੍ਹਿਆ
ਇਕ ਭੈਣ ਦੇ ਦੇ ਰੱਬਾ ਵੇ ਪਿਆਰਿਆ!
ਮੈਂ ਵੀ ਭੈਣ ਨੂੰ ਡੋਲੀ ਦੇ ਵਿੱਚ ਪਾਊਂਗਾ
ਫੇਰ ਤੀਆਂ ਨੂੰ ਸੰਧਾਰਾ ਲੈ ਕੇ ਜਾਊਂਗਾ
ਜਦੋਂ ਮਾਮਾ ਬਣੂ ਦਿਲ ਜਾਊ ਠਾਰਿਆ
ਇਕ ਭੈਣ ਦੇ ਦੇ ਰੱਬਾ ਵੇ ਪਿਆਰਿਆ!
ਮੇਰੇ ਵਿਆਹ ਦੀਆਂ ਘੋੜੀਆਂ ਉਹ ਗਾਊਗੀ
ਸਿਹਰਾ ਬੰਨ੍ਹੂ, ਨਾਲੇ ਕਲਗੀ ਸਜਾਊਗੀ
ਭੈਣ ਬਿਨਾਂ ਕਿੱਦਾਂ ਜਾਊਂ ਮੈਂ ਸ਼ਿੰਗਾਰਿਆ?
ਇਕ ਭੈਣ ਦੇ ਦੇ ਰੱਬਾ ਵੇ ਪਿਆਰਿਆ!
ਭੈਣਾਂ ਬਿਨਾਂ ਕਾਹਦਾ ਦੁਨੀਆਂ ’ਚ ਸੀਰ ਵੇ?
ਏਹੀ ਸਾਕ ਜਿਹੜਾ ਨਿੱਭਦਾ ਅਖੀਰ ਵੇ
ਸੰਗ ਮਿੱਤਰਾਂ ਰਲ਼ਾ ਦੇ, ਮਿਹਰਾਂ ਵਾਲਿਆ!
ਇਕ ਭੈਣ ਦੇ ਦੇ ਰੱਬਾ ਵੇ ਪਿਆਰਿਆ !
No comments:
Post a Comment